‪‎अविरत ‪काव्यदिंडी - १

देखणे ते चेहेरे, जे प्रांजळाचे आरसे

गोरटे कि सावळे, या न मोल फारसे

तेचि डोळे देखणे, जे कोंडिती साऱ्या नभा

वोळिती दु: खे जनांच्या, सांडिती नेत्रप्रभा

देखणे ते ओठ की जे, ओविती मुक्ताफळे

आणि ज्यांच्या लाघवाने, सत्य होते कोवळे

देखणे ते हात, ज्यांना निर्मितीचे डोहळे

मंगलाने गंधलेले, सुंदराचे सोहळे

देखणी ती पाउले, जी ध्यासपंथे चालती 

वाळवंटातूनसुध्दा, स्वस्तिपद्मे रेखिती

देखणे ते स्कंध ज्या ये सूळ नेती स्वेच्छया 

लाभला आदेश प्राणा, निश्चये पाळावया

देखणी ती जीवने, जी तृप्तिची तीर्थोदके

चांदणे त्यातून वाहे, शुभ्र पाऱ्यासारखे

देखणा देहांत तो, जो सागरी सूर्यास्तसा

अग्निचा पेरून जातो, रात्रगर्भी वारसा

- कविवर्य बा. भ. बोरकर